Reperi i njohur Pitbull ka hyrë zyrtarisht në Librin Guinness të Rekordeve Botërore, pasi 22.141 fansa të veshur me kapele që iemitonin u mblodhën në koncertin e tij në BST Hyde Park në Londër, duke vendosur rekordin për grumbullimin më të madh të njerëzve me "bald caps".
Rekordi u konfirmua zyrtarisht të dielën nga gjyqtari i Guinness World Records, Will Munford.
Nisma ishte paralajmëruar prej muajsh nga Pitbull, emri i vërtetë i të cilit është Armando Christian Pérez, pasi artisti kishte shprehur dëshirën ta kthente traditën e fansave të tij në një rekord botëror. Prej disa turnesh, admiruesit e tij paraqiten në koncerte të veshur si ai, me kokë tullace, syze dielli dhe kostume elegante, një fenomen që njihet si lëvizja "Bald E".
Mbrëmja ishte historike edhe për një tjetër arsye. Koncerti i Pitbull mblodhi 69.999 spektatorë, duke u bërë performanca me pjesëmarrjen më të madhe në historinë e festivalit BST Hyde Park.
Koncerti nisi me hitin "Don't Stop the Party", ndërsa artisti interpretoi edhe këngët "Hotel Room Service", "International Love", "I Feel Good", "Time of Our Lives" dhe "Give Me Everything".
Në skenë iu bashkuan edhe dy të ftuar surprizë, Lil Jon dhe Kesha. Me Lil Jon interpretoi disa këngë, ndërsa me Kesha solli hitin e njohur "Timber".
Në fund të mbrëmjes, Pitbull surprizoi publikun britanik duke kënduar edhe "Wonderwall" të grupit Oasis, si një homazh për fansat anglezë, përpara se spektakli të mbyllej me fishekzjarre mbi Hyde Park.
Turneu i tij "I'm Back Tour" ka shitur mbi 2 milionë bileta në 27 vende, duke u bërë turneu solo më i suksesshëm në karrierën e Pitbull.
