Minka Kelly duket se ka reaguar në mënyrë të tërthortë për herë të parë pas ndarjes së papritur nga partneri i saj prej disa vitesh, Dan Reynolds.
Aktorja publikoi në Instagram një citat domethënës për shpirtrat binjakë dhe njerëzit që hyjnë në jetën tonë për të na ndryshuar, duke nxitur spekulimet se mesazhi mund të lidhet me fundin e romancës së saj.
Aktorja e serialit “Ransom Canyon”, 46 vjeçe, ndau fundjavën e kaluar një mesazh për rëndësinë e të ecurit përpara dhe për mënyrën se si duhet t’i shohim marrëdhëniet që kanë lënë gjurmë në jetën tonë.
“Shpirtrat binjakë, ose njerëzit që fati i sjell në rrugën tonë, mund të jenë persona që hyjnë në jetën tonë dhe e ndryshojnë atë”, thuhej në citatin e publikuar nga aktorja.
Mesazhi vijonte me një reflektim mbi rëndësinë e pranimit të ndryshimeve dhe të mësimeve që sjellin marrëdhëniet.
“Idealisht, çështja nuk është të kapemi pas tyre, por të kuptojmë çfarë sollën në jetën tonë. Çfarë mësuam dhe si ndryshuam? Bëhet fjalë për t’i parë këta njerëz dhe këto situata si një dhuratë, si hapa në zhvillimin tonë personal”, thuhej më tej në mesazh.
Citatin, Kelly e kishte vendosur në fund të një postimi me disa fotografi, ku pjesa më e madhe e imazheve e shfaqnin atë në shoqërinë e miqve të saj.
Megjithëse aktorja nuk e përmendi drejtpërdrejt ndarjen, mesazhi i saj u interpretua si një reflektim i mundshëm mbi fundin e marrëdhënies me këngëtarin e grupit Imagine Dragons.
Lajmi për ndarjen e Minka Kelly dhe Dan Reynolds, 39 vjeç, u bë publik në fillim të këtij muaji. Një burim i tha revistës “People” se ndarja kishte ndodhur së fundmi.
Deri më tani, asnjëri prej tyre nuk ka dhënë një deklaratë publike lidhur me arsyet që çuan në përfundimin e marrëdhënies. Sipas “Daily Mail”, përfaqësuesve të aktores u është kërkuar një koment për këtë çështje.
Megjithatë, vetëm pak muaj më parë, gjithçka dukej se po shkonte mirë mes çiftit. Në korrik, Kelly publikoi në Instagram fotografi nga një udhëtim në Disneyland, ku shfaqej së bashku me Reynolds dhe fëmijët e tij. Aktorja e shoqëroi postimin me fjalët: “Nuk do të doja të isha askund tjetër”.
Minka Kelly dhe Dan Reynolds u përfolën për herë të parë si çift në nëntor të vitit 2022, pasi u panë së bashku në Los Anxhelos. Reynolds ishte i martuar më parë me këngëtaren Aja Volkman. Ata u martuan në vitin 2011 dhe njoftuan ndarjen në shtator të vitit 2022. Divorci i tyre u finalizua në mars të vitit 2024.
Ish-çifti ka katër fëmijë: Arrow, 14 vjeç, binjaket Gia dhe Coco, nëntë vjeçe, si dhe Valentine, shtatë vjeç. Prindërit kanë rënë dakord për kujdestari të përbashkët.
Në korrik të vitit 2024, këngëtari kishte folur me entuziazëm për marrëdhënien me Kelly-n, duke treguar se që nga takimi i tyre i parë ishin bërë pothuajse të pandashëm.
“Pas rreth një muaji u takuam personalisht dhe, që nga ai moment, kemi qenë të pandashëm”, kishte deklaruar ai për revistën “People”.
“Minka dhe unë kemi një marrëdhënie shumë të lumtur dhe të shëndetshme”, ishte shprehur këngëtari në atë kohë.
Në të njëjtën intervistë, këngëtari kishte treguar se fëmijët e tij e kishin pranuar mirë aktoren dhe se ai e konsideronte këtë një mundësi për të zgjeruar rrethin e njerëzve që u ofronin dashuri dhe mbështetje.
“Fëmijët e duan shumë Minka-n dhe e duan shumë edhe nënën e tyre, dhe kjo është krejtësisht në rregull. Ne e shohim këtë si një bonus për familjen: më shumë njerëz për të dashur dhe më shumë njerëz që mund të ndihmojnë”, kishte thënë ai.
