Aktori i njohur i serialit How I Met Your Mother, Jason Segel, i ka dhënë fund beqarisë. 46-vjeçari është martuar me partneren e tij prej disa vitesh, balerinën Kayla Radomski, 35 vjeçe, në një ceremoni romantike në Kaliforni.
Lajmi u bë publik pasi Radomski ndau disa fotografi nga dita e tyre e veçantë në Instagram Stories, duke e përshkruar dasmën si një ëndërr të realizuar.
“Dita e djeshme ishte një ëndërr e vërtetë”, shkroi ajo, duke shtuar se kishte kaluar një ditë të mbushur me emocione dhe lot gëzimi.
Nusja tërhoqi vëmendjen me një fustan të bardhë elegant, të zbukuruar me motive lulesh rozë dhe me një bisht të gjatë. Në disa fotografi, ajo shfaqet me një vello dantelle, ndërsa Segel zgjodhi një kostum elegant të errët.
Ceremonia u zhvillua në praninë e familjarëve dhe miqve të ngushtë, ndërsa të ftuarit u udhëzuan të visheshin me kostume dhe kravatë. Pas ceremonisë, festimet vijuan me darkë dhe vallëzim.
Çifti e kishte bërë publike fejesën në qershor të vitit 2025, pas rreth dy vitesh lidhjeje. Ata u shfaqën për herë të parë së bashku në tapetin e kuq në ceremoninë e Golden Globes në vitin 2024.
Radomski është e njohur për pjesëmarrjen në spektaklin e kërcimit So You Think You Can Dance, ndërsa Segel ka fituar popullaritet ndërkombëtar falë roleve të tij në filma dhe seriale, përfshirë How I Met Your Mother dhe Shrinking.
