Mark Gjonaj, i ka drejtuar një letër kryeministrit Edi Rama, ku dënon dhunën policore ndaj të rinjve që protestojnë në Shqipëri.
Në reagimin e tij, Gjonaj shpreh shqetësimin për trajtimin e protestuesve dhe kërkon hetime të pavarura për rastet e dhunës policore, si dhe vënien para përgjegjësisë të personave përgjegjës.
Gjonaj e cilëson të papranueshme dhunën ndaj protestuesve dhe thekson se asnjë interes politik nuk mund të justifikojë rrezikimin e jetës së qytetarëve.
“Asnjë fitore politike nuk vlen sa jeta e një shqiptari”, është mesazhi që përcjell ai në qëndrimin e tij.
Përmes letrës, Mark Gjonaj njofton gjithashtu dorëheqjen nga Këshilli i Diasporës, me efekt të menjëhershëm.
Ai ngre edhe çështjen e nevojës për një qeveri tranzitore dhe reforma demokratike, duke kërkuar ndryshime në drejtimin politik të vendit. Sipas qëndrimit të tij, ndryshimi i udhëheqjes është rruga për të dalë nga situata aktuale.
Reagimi i Gjonajt vjen në një kohë kur protestat e studentëve dhe të rinjve në Shqipëri kanë nxitur debate mbi përdorimin e forcës nga policia, përgjegjësinë institucionale dhe respektimin e të drejtës për protestë paqësore.
