Michael Douglas do të rrëfejë jetën e tij pa filtra në librin e ri me kujtime “One Helluva Ride”. Aktori dhe producenti i njohur do të sjellë një rrëfim personal për karrierën, familjen dhe betejat që ka kaluar gjatë dekadave në Hollywood.
Libri, i cili do të publikohet këtë vjeshtë nga Grand Central Publishing, do të përfshijë histori nga fëmijëria e tij e ndërlikuar, marrëdhënia me babain e tij të ndjerë, aktorin dhe regjisorin Kirk Douglas, si dhe rrugëtimin e tij drejt famës.
Douglas, 81 vjeç, pati suksesin e madh të parë në moshën 30-vjeçare, kur fitoi çmimin Oscar si producent i filmit të vitit 1975 “One Flew Over the Cuckoo’s Nest”. Gjatë karrierës së tij ai u bë pjesë e filmave të suksesshëm si “Fatal Attraction”, “Basic Instinct” dhe “Wall Street”, për të cilin fitoi Oscar-in e dytë.
Në librin e ri, aktori nuk do të ndalet vetëm te sukseset profesionale, por do të flasë edhe për periudhat më të vështira të jetës së tij, përfshirë martesën e parë të trazuar, problemet me varësinë, betejën me kancerin në fazën e katërt dhe sfidat familjare.
Douglas do të rrëfejë gjithashtu për përballjen me problemet e djalit të tij, Cameron, si dhe martesën 25-vjeçare me aktoren Catherine Zeta-Jones.
“Dua ta tregoj historinë time sipas mënyrës sime. Jo versionin e krijuar nga titujt apo shifrat e arkëtimeve, por historinë e vërtetë”, është shprehur Douglas për vendimin e tij për të publikuar librin.
“One Helluva Ride” do të dalë në treg më 6 tetor dhe është tashmë i disponueshëm për porosi paraprake.
