Është zbuluar identiteti i shqiptarit të arrestuar në Greqi, i dyshuar si drejtues i një rrjeti që trafikonte kokainë të fshehur në ngarkesa me lule nga Kolumbia.
Bëhet fjalë për 56-vjeçarin Lulzim Caka, i njohur edhe me aliasin John Franko. Ai rezulton i kërkuar nga autoritetet shqiptare dhe sipas të dhënave të publikuara, është dënuar me 25 vite burg për disa vrasje.
Caka është bërë i njohur edhe për arratisjen nga burgu në Shqipëri në vitin 2019. Ai ka pasur më herët përplasje edhe me drejtësinë greke. Në vitin 2022, Greqia refuzoi kërkesën e autoriteteve shqiptare për ekstradimin e tij.
Arrestimi i 56-vjeçarit u bë në kuadër të operacionit kundër një grupi të dyshuar për trafik ndërkombëtar kokaine. Droga fshihej në ngarkesa me lule të importuara nga Kolumbia. Hetimet vijojnë për të përcaktuar rolin e Cakës në rrjet, si edhe lidhjet e tij me persona të tjerë të përfshirë në trafik.
