Kryetari i Shoqatës së Gjyqtarëve, Engert Pëllumbi ka reaguar për përplasjen mes qeverisë dhe gjyqësorit për pagat e magjistratëve, duke paralajmëruar edhe një shtesë të kallëzimit penal në SPAK. Pëllumbi tha se vendimi i Gjykatës Kushtetuese për pagat është i detyrueshëm dhe nuk mund të konsiderohet ndërhyrje e paligjshme në buxhet.
“Gjykata Kushtetuese nuk e hap derën e thesarit në mënyrë të paligjshme. Ajo ka shpallur antikushtetues uljen e pagave të gjyqtarëve”, deklaroi ai.
Pëllumbi komentoi edhe deklaratat e kryeministrit Edi Rama, i cili ka kundërshtuar mënyrën se si gjyqësori kërkon ekzekutimin e vendimit për pagat. Sipas tij, nëse një zyrtar i lartë pranon se ka qenë pjesë e vendimmarrjes për mosekzekutimin e një vendimi gjykate, çështja mund të marrë edhe përgjegjësi penale.
“Ne mund të depozitojmë një shtesë të kallëzimit penal në SPAK”, tha Pëllumbi, duke shtuar se prokuroria ka detyrimin të hetojë çdo person ndaj të cilit ka dyshime të bazuara.
Ai bëri të ditur se në kallëzimin e gjyqtarëve janë referuar veprat penale “Shpërdorimi i detyrës” dhe “Pengimi i ekzekutimit të vendimeve të gjykatës”.
Pëllumbi këmbënguli se gjyqtarët nuk kërkojnë privilegje, por zbatimin e vendimit të Gjykatës Kushtetuese. Sipas tij, formula e pagave nuk është objekt negocimi. Ai paralajmëroi se, nëse mazhoranca ndërhyn sërish në ligj, gjyqtarët do t’i drejtohen edhe një herë Gjykatës Kushtetuese. Pëllumbi bëri të ditur gjithashtu se Prokuroria e Beratit ka regjistruar një procedim penal pas kallëzimit të punonjësve të administratës së gjykatës, lidhur me mosekzekutimin e pagesave.
