Protesta qytetare para Kuvendit, ndërsa nisi seanca parlamentare u shoqërua me tensione, përplasje dhe ndërhyrje të policisë, duke prodhuar pamje që u transmetuan edhe nga Associated Press, agjencia më e madhe e lajmeve në botë, e cila ndoqi zhvillimet drejtpërdrejt edhe në kanalin e saj në YouTube.
Demonstrata, ku morën pjesë qytetarë të moshave të ndryshme, nisi përballë Parlamentit, por situata u përshkallëzua kur një pjesë e protestuesve tentuan të çanin kordonin e sigurisë dhe të kalonin gardhin metalik.
Policia reagoi me mjete irrituese dhe mjete ujore për shpërndarjen e turmës, ndërsa nga përplasjet u raportuan protestues të lënduar, mes tyre një vajzë me dëmtime në fytyrë dhe një i ri që u transportua me ambulancë i mbuluar në gjak.
Disa persona të tjerë kërkuan ndihmë mjekësore për shkak të efekteve të gazit dhe sprajit irritues, ndërsa pati raportime edhe për efektivë policie të lënduar.
Tensionet nuk mbetën vetëm përpara Kuvendit. Protestuesit u përpoqën të bllokonin qarkullimin në bulevardin “Zhan d’Ark” dhe në “Rrugën e Elbasanit”, duke nxjerrë në rrugë kosha mbeturinash, duke u bërë thirrje drejtuesve të automjeteve të fiknin makinat dhe t’u bashkoheshin protestës.
Pas denoncimit për disa protestues me plagë në lëkurë, ministri i Brendshëm Besfort Lamallari deklaroi në Kuvend se Policia e Shtetit përdori lëndë irrituese të certifikuara, konkretisht sistemet RSG8 TW1000 Professional dhe VESK RSG 8000 Special, të cilat sipas tij përdoren edhe nga forcat policore në vendet e Bashkimit Europian dhe në Shtetet e Bashkuara.
Pamjet e mëposhtme tregojnë dinamikën e asaj që ndodhi sot përpara Parlamentit, nga momentet e para të protestës deri te përplasjet mes protestuesve dhe policisë, ndërhyrja e forcave të rendit dhe transportimi i të lënduarve nga ekipet e emergjencës.
