Ndërmarrjet shqiptare po rrisin përdorimin e teknologjive digjitale, ndërsa inteligjenca artificiale, shitjet online, shërbimet cloud dhe sistemet ERP po fitojnë terren në aktivitetin e biznesit.
Sipas publikimit më të fundit të iNSTAT për “Statistikat e Teknologjisë së informacionit dhe Komunikimit në Ndërmarrje 2026”, rreth 12.4% e ndërmarrjeve me 10 e më shumë të punësuar përdorën sisteme të inteligjencës artificiale gjatë vitit 2026, nga 9% në vitin 2025.
Rritje është shënuar edhe në përdorimin e shërbimeve cloud. Përqindja e ndërmarrjeve që përdorin këto shërbime u rrit në 35.3%, nga 33.9% një vit më parë.
Një tjetër tregues i digjitalizimit është përdorimi i sistemeve ERP për planifikimin e burimeve të ndërmarrjes. Këtë vit rreth 36.9% e ndërmarrjeve përdorën një ose një grup aplikacionesh ERP**, kundrejt 31.1% në vitin 2025.
Shitjet online marrin më shumë peshë
Tregtia elektronike vijon të zgjerohet. Sipas iNSTAT,31.3% e ndërmarrjeve shitën produkte ose shërbime online në vitin 2026, nga 28.1% në vitin 2025. Ndërkohë, pesha e shitjeve online në xhiron totale të ndërmarrjeve u rrit në 11.4%, nga 10.1% një vit më parë.
Për ndërmarrjet me 250 e më shumë të punësuar, shitjet online përbënin 12.1% të xhiros në vitin 2026, nga 9.9% në vitin 2025. Tek ndërmarrjet e vogla, me 10–49 të punësuar, kjo peshë ishte po 12.1%, nga 11.9% një vit më parë.
Ndërmarrjet e mesme, me 50–249 të punësuar, regjistruan një peshë prej 10.1%, e pandryshuar nga viti 2025.
Aksesi në internet është tashmë pothuajse universal tek ndërmarrjet e përfshira në vrojtim.
Këtë vit 99.5% e ndërmarrjeve përdorën kompjuter me akses në internet për qëllime pune, nga 99.4% në vitin 2025.
Ndërkohë, rritje më e dukshme është regjistruar te punonjësit, pasi 38.3% e të punësuarve përdorin kompjuter me akses në internet për qëllime pune, nga 35.1% në vitin 2025.
Këtë vit 62.9% e ndërmarrjeve kishin një faqe interneti, nga 61% një vit më parë.
Përdorimi i mediave sociale arriti në 88.1%, me një rritje prej 1.6 pikësh përqindjeje krahasuar me vitin 2025.
AI përdoret më shumë nga kompanitë e mëdha
Madhësia e ndërmarrjes vijon të jetë një faktor i rëndësishëm në adoptimin e teknologjive të reja. Rritja më e madhe e përdorimit të inteligjencës artificiale u regjistrua tek ndërmarrjet me 250 e më shumë të punësuar, ku treguesi arriti në 28.1% në vitin 2026, nga 24.8% në vitin 2025.
Edhe përdorimi i cloud është më i përhapur tek kompanitë e mëdha. Këtë vit 59.2% e ndërmarrjeve me 250+ të punësuar përdorën shërbime cloud, nga 54.5% një vit më parë.
Tek ndërmarrjet e mesme treguesi u rrit nga 46.3% në 49.7%, ndërsa tek bizneset e vogla nga 31% në 32%./ Monitor
