Shtetet e Bashkuara dhe Serbia kanë hapur zyrtarisht dialogun e parë strategjik mes dy vendeve, një zhvillim që Beogradi e konsideron si një moment historik në marrëdhëniet dypalëshe. Raundi inaugurues i bisedimeve u zhvillua në Uashington, ku delegacioni serb u drejtua nga ministri i Jashtëm Marko Gjuriç, ndërsa dialogu u hap nga Sekretari amerikan i Shtetit, Marco Rubio.
Në përfundim të takimit, Serbia dhe SHBA nënshkruan dy memorandume bashkëpunimi. I pari lidhet me sektorin e energjisë dhe, sipas Gjuriçit, do të krijojë perspektiva të reja për sigurinë energjetike të Serbisë, pasi parashikon ndërtimin e ndërlidhësve të rinj të gazit.
Memorandumi i dytë ka të bëjë me arsimin dhe zgjerimin e Programit Fulbright. Sipas ministrit serb, marrëveshja synon të krijojë mundësi të reja për studentët, studiuesit dhe shkencëtarët serbë, duke forcuar njëkohësisht bashkëpunimin akademik mes dy vendeve.
Në margjinat e dialogut strategjik, Gjuriç zhvilloi gjithashtu një takim me Zëvendës Sekretarin amerikan të Shtetit, Christopher Landau.
Ministri serb e cilësoi hapjen e dialogut strategjik si një kthesë historike në marrëdhëniet mes Beogradit dhe Uashingtonit.
“Ka ditë në diplomaci që janë procedurale, ka ditë kur shkruhet historia. Unë besoj fuqimisht se sot po shkruhet historia e marrëdhënieve serbo-amerikane. Hapja e dialogut strategjik nuk është vetëm një hap procedural, por një hap themelor përpara në marrëdhëniet midis Serbisë dhe SHBA-së”, tha Gjuriç.
Sipas tij, ky mekanizëm do të krijojë një kornizë të përhershme bashkëpunimi institucional mes dy vendeve, e cila do të vazhdojë pavarësisht ndryshimeve politike në të dyja anët, duke përfshirë ministri dhe agjenci të ndryshme shtetërore.
Gjuriç e vendosi këtë zhvillim në të njëjtin nivel me momentet më të rëndësishme të historisë së marrëdhënieve mes Serbisë dhe Shteteve të Bashkuara.
“Ky është një moment historik në historinë 145-vjeçare të Serbisë dhe Shteteve të Bashkuara, së bashku me momentin kur flamuri serb valëviti mbi Shtëpinë e Bardhë gjatë Presidentit Woodrow Wilson dhe miqësisë së tij me Mihajlo Pupin, si dhe miqësinë dhe bashkëpunimin me Mbretërinë e Serbisë, bashkëpunimin tonë gjatë të dy luftërave botërore dhe atë që kemi arritur së bashku në rindërtimin dhe ndërtimin e vendit tonë pas luftës, hapja e këtij dialogu strategjik përfaqëson arritjen e radhës të rëndësishme”, tha Gjuriç.
Ai shtoi se nisja e dialogut strategjik është rezultat i viteve të tëra përpjekjesh diplomatike dhe falënderoi të gjithë ata që kanë kontribuar në realizimin e tij.
Një tjetër zhvillim me rëndësi gjatë vizitës në Uashington ishte anëtarësimi zyrtar i Serbisë në programin hapësinor Artemis të NASA-s. Marrëveshja u nënshkrua në selinë e agjencisë amerikane të hapësirës nga ministri Marko Gjuriç, i cili e cilësoi atë si “një ditë historike për shkencën serbe”.
Nga ana e tij, Departamenti Amerikan i Shtetit e përshëndeti hapjen e dialogut strategjik dhe vlerësoi se marrëdhëniet mes SHBA-së dhe Serbisë po hyjnë në “një epokë të re”.
