Prokuroria e Durrësit ka nisur procedim penal ndaj një 44-vjeçari, i dyshuar se në bashkëpunim me dy persona të tjerë ka ushtruar dhunë fizike ndaj një çifti dhe ka dëmtuar automjetin e tyre pas një konflikti të çastit. Ngjarja ka ndodhur më 30 janar, rreth orës 17:30, në zonën Nishtulla në Durrës.
Pas një përplasjeje për motive të dobëta, tre persona dyshohet se kanë goditur me grushte një burrë dhe një grua, të dy 55 vjeç. Ata kanë thyer xhamat e derës së shoferit dhe të pasagjerit të një automjeti tip “Ford Focus”. Materialet procedurale janë referuar në Prokurorinë e Durrësit për veprat penale “plagosje e lehtë me dashje” dhe “shkatërrim i pronës”, të kryera në bashkëpunim. Ndërkohë, dy personat e tjerë të përfshirë në konflikt janë shpallur në kërkim nga policia. Autoritetet po punojnë për sqarimin e plotë të rrethanave të ngjarjes.
