Policia e Gjirokastrës ka arrestuar Klement Kursa, 39 vjeç, nga Dibra me banues në Gjirokastër, pasi dyshohet se ka abuzuar seksualisht me vajzën e mitur të partneres së tij. Autoritetet policore kanë bërë të ditur ngjarjen, përmes metodave hulumtuese, ndërkohë që nga ana e 12-vjeçares apo nënës së saj, nuk ka një denoncim konkret.
Sipas uniformave blu Klement Kursa ka qenë i arrestuar pesë ditë më parë në një aksion blic nga Policia e Dibrës dhe ajo e Gjirokastrës, pasi ai, së bashku me të vëllanë e tij binjak, dyshohet të jenë autorë të një vrasjeje të ndodhur në Dibër në vitin 2018.
Gjatë kontrollit të ushtruar në banesën e binjakëve dibranë në Gjirokastër, u gjetën dhe u sekuestruan, 3 armë zjarri, 2 kallashnikovë dhe 1 pushkë, 1 thikë, 3 krehëra, municion luftarak, 1 maskë dhe 3 aparate celularë. Gjykata e Gjirokastrës e la të lirë Klement Kursën, në seancën e vlerësimit të masës së arrestit, ndërsa sot është arrestuar sërish për dyshime për ngacmim seksual ndaj të bijës së bashkëjetueses gjirokastrite.
