Kur e pranuan në gjirin e partisë, socialistët i bënë Alqi Bllakos një ofertë për t'u patur zili; një vend të sigurtë në listën e kandidatëve të Tiranës. Jo më kot, ai braktisi Ilir Metën në presidencë dhe iu bashkua shokëve socialistë për fushatën e vitit 2021. Dhuratën që i bënë Alqi Bllakos, në PS e justifikuan me nevojën për "gjak të ri", që kishte partia.
Ra në sy gjatë fushatës, vëmëndja e veçantë që i kushtoi Erjon Veliaj. Kryebashkiaku i bëri Bllakos një trajtim preferencial, pasi shkonte personalisht në takimet e tij, për ta ndihmuar në arritjen e një rezultati sa më të mirë në njësinë nr.1 të Tiranës, duke i ofruar kohë televizive dhe mbështetjen e administratës së bashkisë, tepër të nevojshme në këto raste.
Në shtator të 2021, Bllako, nga një burokrat i shkathët i zyrave të shtetit e pa veten përfaqësues të popullit në kuvendin e Shqipërisë. Vetëm se jo çdo gjë e mirë, vjen për mirë.
Pozicioni i deputetit, mish i pranueshëm për topat e SPAK
Po ta shohësh nga 3 vite distancë promovimi që iu bë Bllakos, nga sekretar i Lefter Kokës në deputet i Partisë Socialiste në Tiranë, kupton se ajo ka qenë shkatërruese për të.
Kur dyshja Rama-Veliaj e joshi me postin e deputetit, emri i Bllakos dilte në dosjet e SPAK si një ndër të dyshuarit e hetimeve për inceneratorin e Elbasanit, Fierit dhe të Tiranës. Vetëm se në realitet, pozicioni i tij nuk është politik dhe as drejtues në vjedhjen e inceneratorëve.
Si sekretar i ish-ministrit të mjedisit Lefter Koka, ai ka zbatuar porositë e Kokës duke "kopsitur" dokumentat, për të cilin shefat e mëdhenj kishin rënë dakort më parë.
Edhe nga shuma për të cilën e akuzon SPAK, Bllako del të jetë një lojtar periferik i grabitjes së madhe.
Dumani ka vështirësi me zbulimin e “krimeve intelektuale”
Bllako akuzohet se ka vjedhur 120 mijë euro, kur bindi Klodian Zoton të blejë një pajisje në kompaninë e babait të tij në Ersekë. Ai fajësohet edhe për rrogën që mori një punonjës i Klodian Zotos, i quajtur Vladimir Bezhani i cili ndihmoi për hartimin e dokumentave të tenderit të inceneratorit.
Gjithsej bëhet fjalë për rreth 200 mijë euro. Shuma është e papërfillshme, kur e krahason me babëzinë e kokave të vërteta të inceneratorit të Tiranës, që është 128 milion euro.
Megjithatë këtë të dielë, prokurorët e SPAK njoftuan se kishte përfunduar hetimet për përfshirjen e Alqi Bllakos për inceneratorin e Tiranës, duke e vendosur atë ndër prioritetet e hetimeve.
Emrat e tjerë në dosjen e inceneratorit të Tiranës
Veçimi i Alqi Bllakos si një ndër të hetuarit e posaçëm në aferën e inceneratorëve nuk paralajmëron asgjë të mirë në ndëshkimin e autorëve të vërtetë të aferës. Sepse krimi me inceneratorin e Tiranës përfshin disa nga pozicionet më të larta në hiarkinë shtetërore.
Në dosje ka emra të tjerë, shumë më të rëndësishëm se Bllako.
Përveç ish-ministrit të Mjedisit, Lefter Koka, është edhe kryetari i Bashkisë së Tiranës, Erjon Veliaj që ka firmosur financimin e inceneratorit pa pyetur Këshillin Bashkiak. Në dosje përmendet edhe kryeministri Edi Rama dhe sekretari i tij, Ëngjëll Agaçi, që kanë firmosur për bonusin 8% të kompanisë së Klodian Zotos, kur kjo kompani ende nuk ishte krijuar.
Si e mbrojti Rama me Veliajn djegien e miliona eurove tek inceneratori i Tiranës
Denoncimi i Nar Kokës/ Çfarë i premtoi Rama tim vëllai në emër të SPAK
Pavarësisht këtyre, njoftimi i sotëm i SPAK tregoi vëmëndjen e veçantë që kërkohet t'i jepet Alqi Bllakos në përfshirjen e tij për inceneratorin e Tiranës.
Bashkë me Lefter Kokën, ndaj tyre janë dhënë dy dënime të tjera për inceneratorët e Elbasanit dhe të Fierit. Mbetet për t'u parë nëse prokurorët do të ndalen tek të njëjtat vija të kuqe edhe për inceneratorin e Tiranës duke ia lënë fajin ish-ministrit dhe sekretarit të tij, që ka vjedhur 120 mijë euro. /Lapsi.al
