Mediat e Kosovës raportojnë se një shpërthim ka ndodhur në qytetin e Zveçanit, në veri të Kosovës. Gazetarja e RTK-së në një lidhje direkte nga Zveçani raportoi se në orët e mbrëmjes ka pasur një shpërthim.
Ajo tha se nuk dihet nëse ky shpërthim ishte shkaktuar nga ndonjë kapsollë e fuqishme apo koktej molotovi. Gazetarja konfirmoi se mjeti shpërthyes është hedhur në drejtim të trupave të KFOR-it. Sipas të njëjtave burime, një grup serbësh kanë provokuar vazhdimisht trupat e NATO-s, sidomos në orët e mbrëmjes.
Më herët gjatë ditës së martë pati të tjera incidente mes serbëve dhe KFOR-it në Zveçan. Lajmin e dhanë gazetarët e T7 që ndodhen në terren. Ata thanë se po hasin në probleme që të kryejnë punën e tyre dhe të transmetojnë pamje nga vendi i ngjarjes.
Sipas të njëjtave burime, protestuesit serbë kanë hedhur molotovë dhe fishekzjarrë ndaj forcave të KFOR. Në momentin që nisën incidentet ushtarët e KFOR-it që urdhëruan mediat që të largohen nga zona. ©LAPSI.al
