Presidenti ukrainas Volodymyr Zelensky, i cili këtë mëngjes paralajmëroi një skenar të luftës botërore duke argumentuar se Rusia nuk do të ndalet vetëm te Ukraina, ka deklaruar se për hir të paqes është i gatshëm për dialog. Zelensky ka dalë në një intervistë për mediat e huaja ku ka thënë se po mendon mundësinë e bërjes së kompromisit për çështjen e Krimesë dhe rajonin e Donbas-it. Në një intervistë për Abc News, Zelensky tha se ishte i hapur për dialog, por se nuk është i përgatitur të dorëzohet.
“Ne mund të bëjmë kompromis për mënyrën sesi do të vazhdojë jeta në këto zona.Për mua, gjëja më e rëndësishme është se si do të jetojnë njerëzit në këto zona që duan të jenë pjesë e Ukrainës… Kështu që çështja është më e ndërlikuar sesa thjesht njohja,” tha Zelensky, duke shtuar se po flasin për zona që vetëm Rusia dhe askush tjetër nuk i ka njohur.
Luftimet në Ukrainë vijojnë prej 13 ditës tashmë. Rusia ka bombarduar disa qytete kryesore, si Kievi dhe Kharkivi, ku mbeti e shkatërruar edhe konsullata e nderit e Shqipërisë aty. Gjithashtu, luftime zhvillohen edhe në qytete të tjera të vendit, sidomos në jug, ku rusët kërkojnë të marrin portin kryesor, në Odessa.
