Në një përpjekje të radhës për uljen e tensioneve mes Ukrainës dhe Rusisë presidenti francez Emmanuel Macron pati një bisedë telefonike që zgjati afro 1 orë e 40 minuta me homologun e tij rus Vladimir Putin. Sipas presidencës franceze të dy presidentët diskutuan rrugë të ndryshme për të vazhduar zbatimin e Marrëveshjeve të Minskut dhe vazhduan diskutimin e tyre mbi kushtet për sigurinë dhe stabilitetin në Evropë. Kreu i shtetit francez i tha sot presidentit rus se një “dialog i sinqertë nuk është në përputhje me një përshkallëzim (ushtarak)” në kufirin ukrainas. Presidenti francez “përcolli gjithashtu shqetësimet e partnerëve dhe aleatëve të tij evropianë”, thuhet në deklaratën e presidencës franceze.
Zëdhënësi i Kremlinit, Dmitry Peshkov, nuk dha detaje të mëtejshme mbi thirrjen.
