Shqipëria përshkruhet si vend që përmbush kërkesat minimale sa i përket transparencës fiskale, sipas raportit të Departamentit Amerikan të Shtetit të vitit 2021.
Sipas raportit, vendi ynë rendit mes 74 vendeve që kanë plotësuar këto kërkesa minimale, ndërsa në vlerësim janë 140 qeveri.
Ne raport po ashtu thuhet se Departamenti ka shqyrtuar kërkesat minimale të transparencës fiskale në konsultim me agjencitë e tjera përkatëse federale dhe i ka azhurnuar dhe forcuar ato kërkesa.
“Departamenti arriti në përfundimin se, nga 141 qeveri të vlerësuara, 74 plotësonin kërkesat minimale të transparencës fiskale. Dy qeveri, Nigeria dhe Gambia, plotësuan kërkesat minimale në 2021 pasi nuk plotësuan këto kërkesa në vitin 2020. Gjashtëdhjetë e shtatë qeveri nuk i plotësuan kërkesat minimale të transparencës fiskale. Megjithatë, nga këto 67, 17 qeveri kanë bërë përparim të dukshëm drejt përmbushjes së kërkesave minimale të transparencës fiskale”, thuhet ndër të tjera në konkluzionet e raportit.
Çfarë është transparenca fiskale
Transparenca fiskale informon qytetarët se si shpenzohen të ardhurat e qeverisë dhe të ardhurat nga taksat dhe është një element kritik i menaxhimit efektiv të financave publike. Transparenca u siguron qytetarëve një dritare në buxhetet qeveritare dhe ndihmon që qeveritë të japin llogari. Ndihmon në ndërtimin e besimit dhe qëndrueshmërisë së tregut. Raporti i Transparencës Fiskale i mandatuar nga Kongresi (FTR) është një mjet për të identifikuar mangësitë dhe për të mbështetur ndryshimet e nevojshme.
Si bëhet vlerësimi
Gjatë kryerjes së rishikimit 2021, Departamenti vlerësoi transparencën fiskale të qeverive gjatë periudhës së rishikimit nga 1 janar deri ne 31 dhjetor 2020.
Departamenti shqyrtoi informacionin nga ambasadat dhe konsullatat amerikane, agjencitë e tjera qeveritare të SH.B.A., organizatat ndërkombëtare dhe organizatat e shoqërisë civile.
Misionet diplomatike amerikane u konsultuan me zyrtarë të qeverisë së huaj, organizata ndërkombëtare dhe organizata të shoqërisë civile për të marrë informacion për këto vlerësime.
