Kosova regjistroi të martën 14 raste të vdekjes nga koronavirusi.
Në njoftimin e Institutit Kombëtar të Shëndetësisë Publike të Kosovës (IKSHPK) thuhet se pesë viktima u regjistruan në Prishtinë, dy në Gjakovë dhe nga një në Ferizaj, Gjilan, Mitrovicë, Pejë, Prizren, Shtime dhe Vushtrri.
Sipas të dhënave të IKSHPK-së, në 24-orëshin paraprak u konfirmuan edhe 752 raste të reja me koronavirus, pas testimit të 3,892 mostrave.
Me këto shifra, numri i përgjithshëm i të infektuarve në Kosovë shkon në 89,507, ndërsa i viktimave në 1,858.
Të shëruar nga koronavirusi janë 73,983 persona në total – prej tyre 665 në 24 orët e fundit.
Raste aktive aktualisht janë 13,666.
Kosova ka nisur këtë javë vaksinimin kundër koronavirusit me vaksinat AstraZeneca.
Dozat e kësaj vaksine, 24 mijë në total, kanë arritur të dielën, përmes programit COVAX të Organizatës Botërore të Shëndetësisë.
