Gjatë një vizite të zhvilluar në spitalin Universitar të Traumës, Ministrja e Shëndetësisë dhe Mbrojtjes Sociale, Ogerta Manastirliu deklaroi se janë vendosur ekipe shtesë për përballimin e urgjencave mjekësore. 100 ekipe të Urgjencës Kombëtare do të janë të shpërndara në terren.
“Të gjithë sistemet dhe strukturat e urgjencave në spitale por edhe të shërbimeve në spitale do të jenë të përforcuara, duke organizuar punën me shërbimin “on call”, pra të mjekëve të cilët do të jenë të gatshëm, nëpërmjet sistemit të thirrjeve për çdo emergjencë që mund të ketë në spitalet tona”, tha Manastirliu.
Duke u ndalur tek situata pandemike gjatë festave, Manastirliu shtoi se nuk do të lejohen grumbullime në sheshe.
“Për kryeqytetin do të kemi 9 ekipe të urgjencës, të cilët do të vendosen në postacione të caktuara dhe dy ekipe shtesë të urgjencës kombëtare si edhe janë siguruar materialet mjekësore, barnat e nevojshme për të përballuar çdo situatë emergjence, qoftë në kuadër të emergjencave, aksidenteve apo problematikave që mund të sjellin festimet e fundvitit”, tha Manastirliu.
