Sulmet Izraelite në Gaza kanë vrarë të paktën gjashtë palestinezë mes tyre një baba dhe djali i tij 13-vjeçar. Tre persona humbën jetën nga një sulm ajror izraelit ndaj banesës së familjes Ghubain, në zonën Daraj të qytetit të Gazës.
Në një tjetër sulm, një baba dhe djali i tij u vranë pasi një tendë ku ata po qëndronin u godit në lagjen Zeitoun, ndërsa një person tjetër u vra nga të shtënat e forcave izraelite në qytetin jugor të Khan Younis. Sulmet kanë vijuar pavarësisht marrëveshjes së armëpushimit të ndërmjetësuar nga Shtetet e Bashkuara vitin e kaluar.
Sipas Ministrisë së Shëndetësisë në Gaza, më shumë se 1,600 palestinezë janë vrarë nga Izraeli që prej hyrjes në fuqi të marrëveshjes. Ndërkohë, bilanci i luftës së nisur më 7 tetor 2023 ka kaluar 74 mijë viktima palestineze, sipas të dhënave të autoriteteve shëndetësore të territorit.
Zyra e Medias e qeverisë në Gaza bëri të ditur se për vetëm 12 orë u përmbytën rreth 70 mijë tenda ku strehohen palestinezët e zhvendosur, ndërsa të paktën pesë persona humbën jetën dhe dëmet materiale llogariten në rreth 3 milionë dollarë. Mijëra familje kanë mbetur të ekspozuara ndaj reshjeve dhe temperaturave të ulëta, në kushte ku tendat nuk ofrojnë mbrojtjen e nevojshme.
Izraeli vijon të kufizojë hyrjen e materialeve të strehimit dhe ndihmave humanitare në territor. Negociatat për fazën e ardhshme të marrëveshjes kanë mbetur të bllokuara, pasi palët nuk kanë arritur një dakordësi për çarmatimin e Hamasit dhe tërheqjen e trupave izraelite nga Gaza.
