Kryeministri Edi Rama bën dy ndryshime të tjera në qeveri. Ai ka njoftuar në rrjetet sociale se do të largohet nga detyra e ministrit të Jashtëm, Gent Cakaj dhe vendin e tij do ta zerë, Olta Xhaçka, e cila mbante postin e ministres së Mbrojtjes.
"Pas një periudhe intensive pune në kryesimin e OSBE si edhe punës së madhe me përkushtim e profesionalizëm të Gent Cakajt si ministër në detyrë, ky është momenti për t’ia kaluar bashkarisht stafetën Olta Xhaçkës që të kryejë detyrën e ministres për Europën dhe Punët e Jashtme.
Dua ta falenderoj me mirënjohje Gentin jo vetëm për dinjitetin në kryerjen e detyrës së derisotme, po edhe për gatishmërinë e plotë për të vijuar përpjekjen e përbashkët, duke u rikthyer në kabinetin e kryeministrit. Ndërkohë Niko Peleshi do të drejtojë ministrinë e mbrojtjes", shprehet Rama.
