Edi Rama u pyet nga gazetarët nëse duhen ndëshkuar me gjoba kryetari i Bashkisë së Tiranës, Erion Veliaj, Presidenti Ilir Meta dhe kryetarja e LSI, Monika Kryemadhi, pasi janë shfaqur në publik pa maskat anti-Covid.
Për Veliajn, Rama tha se e ka korrigjuar gabimin, ndërsa për Metën e Kryemadhin është detyrim i institucioneve për të marrë masa ndaj tyre. Rama e cilësoi skandaloz në të gjitha aspektet faktin që Meta e Kryemadhi shfaqen pa maska.
“Lali Eri e ka korrigjuar gabimin, sepse duke qenë se kaloi Covidin harroi që maska duhet mbajtur, aq më tepër nga dikush që është edhe përfaqësues i institucioneve. Për dy të tjerët natyrisht që duhet të merren masa, por nuk jam unë që i marr këto masa, por institucionet që kanë detyrimin. Është skandaloze në të gjitha aspektet." - u shpreh Rama i cili vazhdoi duke thënë se ata kanë dalë komplet nga binarët dhe se as nuk duhet imagjinuar që të marrin në dorë fatin e vendit.
