Prokurorja e Përgjithshme e përkohshme, Arta Marku, ka firmosur urdhrin për prokurorët në lidhje me masat administrative dhe proceduriale për prokuroritë për periudhën para dhe pas zgjedhore.
Ky urdhër parasheh si qëllim hetimin dhe ndjekjen penale me përparësi dhe efikasitet “ndaj autorëve që prekin zgjedhjet e lira dhe sistemin demokratik të zgjedhjeve apo që cënojnë procesin zgjedhor”.
Gjithashtu, udhëzimi saktëson se do të ketë një bashkëpunim mes prokurorive të të gjitha qarqeve dhe Policive përkatëse, si edhe mes agjencive të zbatimit të ligjit e shërbimeve inteligjente, për të marrë dijeni menjëherë për vepra penale që prekin zgjedhjet e lira dhe sistemin demokratik.
Gjatë periudhës së zgjedhjeve, prokurorët do të jenë në gatishmëri nga ora 07:00 deri në 22:00 dhe do të kenë komunikim të vazhdueshëm me sallën operative të Policisë.
Firmosja e udhëzimit të Prokurorisë së Përgjithshme vjen pak ditë pas ndryshimeve në Kodin Penal të miratuara nga mazhoranca, që sanskionojnë ndëshkime deri në bllokim të lëvizjes jashtë vendit për një periudhë që varion nga 5-10 vjet për ata persona që kryejnë krime zgjedhore.
