Prodhon apo jo talente Superioria është një debat që kërkon kohë, por fakt është se pothuaj cdo vit, lojtarë të talentuar bëjnë kapërcimin në kualitet, duke u transferuar në kampionate më të forta. Një transferim i tillë është pasuri për klubin, sidomos me shifrat e duhura dhe në këtë pikë kampionët e Partizanit mund të fërkojnë duart me një trio që simbolizon të ardhura të rëndësishme.
Në orbitën e skuadrave të huaja është gjithashtu edhe Sherif Kallaku, mesfushori zbulim i Teutës. Sezoni i jashtëzakonshëm me teknikun Shkëmbi si udhërrëfyes teknik nuk ka kaluar pa vëmendje për 21 vjecarin nga Fushë-kruja. 7 gola e 3 asist, ndihmuar durrësakët të arrijnë vendin e tretë në kampionat dhe pikërisht lidershipi i treguar në mesin e fushës e veshin më tepër me vlerë lojtarin.
Jasir Asani, fantazisti shqiptaro-maqedonas ka qenë një nga protagonistët më të spikatur me të kuqtë: tetë gola dhe pesë asist, driblim e teknik, armë që e bënë të rrezikshëm për cdo kundërshtar, janë kartvizita me të cilin 24 vjecari është prezantuar në sytë e vëzhguesve të huaj që e kanë në konsideratë numrin 10, për të cilin Partizani mund të sakrifikojë vetëm me ofertën e duhur. Por Asani ka kërkesa, ashtu si Jurgen Bardhi, falso nueve i kryeqytetasve ka shënuar 5 gola e 5 asist, jo shumë për një sulmues, por jo pak për një 21 vjecar në sezonin e tij të parë si titullar. Në situatë të ngjashme është edhe Esat Mala, mesfushori jolly që kaloi nga diga para mbrojtjes në depërtues me 4 gola e dy assist, që e bënë 20 vjecarin titullar të pazëvendësueshëm për ish-teknikun Gega. Mosha e re, sidomos për dy të fundit rrit ndjeshëm edhe vlerën e kartonit të lojtarëve të Partizanit.
I mbetur në Korcë, Dejvi Bregu është një njohje e vjetër e skautëve pavarësisht moshës 23 vjecare. Vlonjati ka qenë i pafat për të provuar eksperiencën e parë jashtë kufijve, për ngjarje të ditura tashmë, por me 8 gola e 5 asist kandidohet në rrugën e daljes nga Korca, me ofertat që nuk i mungojnë. Lojtari ku një driblim e shpejtësi për tu admiruar, ashtu si aftësitë reflektive të Gentian Selmanit, portierit të U21 që mori edhe thirrjen e parë nga Edy Reja kundër Islandës dhe Moldavisë. 12 herë e ka ruajtur portën e Lacit të paprekur 21 vjecari, një nga portierët më të mirë të Superiores, që natyrisht, bashkë me të tjerët shpresojnë të ndjekin hapat e Uzunit, për të patur edhe një shans më shumë në kuqezi…
