Asnjë cështje tek Kukësi përsa i përket lojtarëve Cordeiro e Reginaldo, të paktën sipas qendrimit të Drejtorit Sportiv të Kukësit, Nderim Nexhipi. Braziliani ka një kontratë me opsion të rinovimit të mëtejshëm edhe për një tjetër vit, ndërsa Reginaldo është i lidhur me klubin veri-lindor deri në fund të sezonit.
Në fakt Cordeiro është drejtuar në zyrat e Federatës Shqiptare të Futbollit për tu informuar për kohën kur aktivizohet automatikisht rinovimi I kontratës, por sipas Nexhipit nuk bëhet fjalë për një dëshirë të lojtarit për të mbyllur bashkëpunimin me Kukësin, por vetëm për të ditur kohën kur do të ulet në bisedime për kontratën, duke qenë se lojtari kërkon një rishikim të disa pikave. Sipas Nexhipit braziliani është pjesë e projektit të klubit edhe për edicionin e ardhshëm, ndaj palët janë gati të bisedojnë për të vazhduar bashkëpunimin, për më tepër që edhe nga lojtari sinjalet janë positive.
Disi më ndryshe për Reginaldon, kontrata e të cilit nuk parashikon rinovimin automatik. Qendërsulmuesi mozambikas e ka kontratën me Kukësin deri në fund të këtij edicioni, por edhe me të do të bisedohet për kontratën e re. Megjithatë, tensionet e fundit të krijuara me lojtarin, nuk janë në favor të tij, por forma e treguar në javët e fundit mund të bëjnë diferencën që sulmuesi të jetë akoma me Blutë sezonin e ardhshëm, pavarësisht ardhjes së Shkurtajt.
