Nuk është mbyllur ende sezoni aktual, por pazëlli i mozaikut për edicionin e ardhshëm po formohet e mbetet për të mësuar edhe një emër, natyrisht përsa i përket formatit dhe jo objektivave të ndryshme të klubeve. Bylis është skuadra e fundit që ka fituar të drejtën e ngjitjes në Superiore për sezonin e ardhshëm, duke marrë tashmë edhe matematikën, pas barazimit të Besës në Lushnje: tetë pikë diferencë tashmë me dy ndeshje për të luajtur.
Një Superiore me emra më të rëndësishëm, duke parë se bashkë me ballshiotët, më herët ishte Vllaznia që kishte fituar matamatikisht të drejtën për tu përfaqësuar në kampionatin elitar të futbollit, duke dominuar Grupin A të Kategorisë së Parë. Për skuadrën e presidentit Besnik Kapllanaj, një rikthim i pritur, pas kryesimit gjatë sezonit të rregullt dhe play off në Grupit B, e cimentuar me fitoren në Kavajë, në fushën e kundërshtarit direkt për promocionin dhe e kurorëzuar me ndalesën e verdhezinjve të coroditur në Roza Haxhiu.
Bylis e Vllaznia marrin kështu vendet e dy skuadrave që do të zbresin nga Superioria në Kategorinë e Parë, edhe të Dytë në këtë rast, me Kamzën të përjashtuar pas incidenteve në ndeshjen me Lacin, ku tifozët e presidenti Qarri goditën arbitrin Eldorian Hamiti, që akordoi një penallti në fundin e ndeshjes për kundërshtarët. Tani mbetet për të parë se cili mes Kastriotit, Tiranës e Luftëtarit do të largohet nga elita e futbollit, me krutanët që janë në vendin e parafundit, por që më fitoren në tavolinë, pikërisht kundër kamzalinjve të përjashtuar, kanë vënë në paqartësi bardheblutë e gjirokastritët që do të luajnë mes tyre, në një ndeshje që do të vendosë shumë.
