Një shpërthim i fuqishëm me granatë ka tronditur konsullatën ruse në Greqi, në orët e para të mëngjesit. Mediat greke shkruajnë se në orën 03.50 dy persona në një motoçikletë kanë hedhur një granatë në hyrje të Konsullatës së Rusisë në Athinë. Granata ka arritur në postin e rojes, ku edhe ka shpërthyer.
Ende nuk raportohet për të plagosur. Ndërkohë sipas dëshmive të para nga banorët përreth mësohet të jetë dëgjuar një shpërthim i fortë. Policia antiterroriste dhe e shpërthimeve speciale ndodhet në zonë për investigime të mëtejshme.
Ky është sulmi i dytë me granatë kundër njësive diplomatike në Athinë, në nëntor 2016 në ambasadën franceze mbeti i plagosur roja. Ndërsa në shkurt 2018 terroristët hodhën granatë në policinë e lagjes Kesariani.
