Nuk ka vonuar hakmarrja menjëherë pas vendimit për t’u larguar nga Grupi Parlamentar i Partisë Socialiste për deputeten e Shkodrës Marjana Koçeku.
Në fund të seancës së të martës, Kuvendi vendosi me 72 votat e mazhorancës largimin e saj si anëtare e Komisionit për Reformën Administrative-Territoriale. Në vend të saj u caktua deputeti Onid Beleri.
Në Komisionin për Europën dhe Punët e Jashtme, Marjana Koçeku u largua nga sekretare e Komisionit dhe në vendin e saj u caktua deputetja Sara Mila. Vendimi u votua në Kuvend me 74 vota pro, 0 abstenim, 1 kundër.
Koçeku u largua edhe si anëtare e Komisionit për Europën dhe Punët e Jashtme. Vendimi u miratua me 73 vota pro, 0 abstenim, 1 kundër.
Koçeku u largua edhe si anëtare zëvendësuese nga Komisioni për Kulturën, Turizmin dhe Diasporën. Në vend të saj u caktua deputetja Ilva Gjuzi. Edhe ky vendim u votua në Kuvend me 73 vota pro, 0 abstenim, 1 kundër. ©LAPSI.al
