Në protestën para Kryeministrisë, protestuesit mblodhën firma për të çuar në SPAK librin ‘Albania Files’ të promovuar nga kryeministri Edi Rama në 700 faqet e të cilit ekspozohen gjithë projektet që planifikohen të bëhen në vend.
Të dielën në podcast-in e tij ‘Flasim’, Rama tha se ai ka shkruar vetëm pararhënien se libri është tërësisht i pavarur dhe përmbledh kontributet e studiove arkitekturore që punojnë prej dy dekadash në Shqipëri.
I pari idenë se kjo qe një dosje e gatshme për SPAK e hodhi publicisti Fatos Lubonja. Ai tha se libri në vetvete është një provë që SPAK të hetojë se si u ndryshua ligji për zonat e mbrojtura që i hapi rrugë projekteve të resorteve që ishin planifikuar para se Rama ta ndryshonte ligjin.
"Një pjesë e mirë e këtyre projekteve janë bërë kur nuk ishte ndryshua ligji për zonat e mbrojtura. Pra ti i ke zonat e mbrojtura dhe i paguar arkitektët të bëjnë projekte në zonat e mbrojtura pa qenë i ndryshuar ligji. Në thelb ç’do të thotë kjo? Se këto projekte kush do I bëjë? Siç ka dalë, krimi i organizuar dhe oligarkët shqiptarë. Kjo është kapje e shtetit" u shpreh Lubonja në studion e News24.
