Presidenti i Kosovës Hashim Thaçi, ka reaguar ndaj vrasjes së 7-vjeçarit në Zvicër. Përmes një postimi në faqen e tij të “Facebook”, Kreu i Shtetit shkruan se e gjithë Kosova dhe Zvicra do të luten për të.
“Vrasja makabre e shtatëvjeçarit në Bazel, ka tronditur gjithë opinionin në Kosovë dhe Zvicër. Në këto momente shumë të rënda, ndaj dhimbjen me familjen e Mërgimit. E gjitha Kosova dhe Zvicra do të luten për të”, shkruan Thaçi.
Kujtojmë që 7-vjeçari I. M nga Lipjani i Kosovës u vra nga një e moshuar 75-vjeçare në Zvicër, në momentin që ai po kthehej nga shkolla në shtëpi. Për 75-vjeçaren dyshohet se vuan nga probleme mendore.
Ende nuk dihet motivi i vrasjes makabre të djaloshit shqiptar në Bazel. Sipas mediave Zviceriane, aktualisht po bëhet ekzaminimi psikiatrik i saj.
