Duket se shtatori do të jetë një muaj i mbushur me zhvillime politike, pasi pozita dhe opozita kanë mbushur motorët e ‘luftës’ politike. Kështu, opozita i ka shpallur ‘luftë frontale’ maxhorancës në qeveri.
Kryetari i Partisë Demokratike Lulzim Basha përmes një postimi në ‘Facebook’ ka sulmuar kryeministrin Edi Rama, ndërsa e akuzon atë për lidhje me krimin. Lideri i demokratëve tha se shumë biznese kanë falimentuar.
“Me Edi Ramën në qeveri, krimi dhe oligarkët pasurohen, bizneset e ndershme falimentojnë”, shkruan Basha, ndërsa ka publikuar edhe një video, të cilën e ka cilësuar si skemën e ‘pasurimit të krimit kundër bizneseve’ ku jep disa argumente kundër kësaj qeverie.
Po ashtu Basha përmes disa shifrave tha se për periudhën janar-gusht 2018 kanë falimentuar 9260 biznese, ndërsa shtoi se në 2017 ishin mbyllur 6140.
