Më shumë se 78 masat administrative janë vendosur në dy orë nga kontrollet në funksion të Planit Operacional “Tispol Gusht 2018”, të cilat po vijojnë në kryeqytet me kontrolle të përqendruar për mënyrën e sjelljes së drejtuesve të mjeteve në rrethrrotullim dhe përparësitë ndaj këmbësorëve.
Kontrollet e rrugorëve të kryeqytetit, janë përqendruar në rrugët dhe rrethrrotullimet kryesore të evidentuara si “zona me trafik të rënduar” për shkak të mosdhënies së përparësisë sipas sinjalizimit të vendosur nga Enti Pronar i rrugës.
Nga verifikimet dhe monitorimet në terren evidentohet një numër i lartë shkelësish, të cilët neglizhojnë detyrimin për të dhënë përparësi në rrethrrotullim apo vendkalim këmbësorësh, duke u bërë shkak për trafik të rënduar dhe rrezik për aksidente rrugore me këmbësorët.
