Përgjigjia e Taulant Ballës për miqësinë me Mond Begon vetëm sa i ka shtuar dyshimet e selisë së Partisë Demokratike për marrëdhënien që ka numri dy i Partisë Socialiste me numrin dy të Bandës së Lushnjës. Madje Edi Paloka tha se në një vend normal, Taulant Balla duhej të kishte dhënë dorëheqjen nga posti që mban, si kryetar i deputetëve socialistë.
Në një konferencë për mediat, Edi Paloka akuzoi kreun e grupit parlamentar të PS-së se ka ndihmuar anëtarin e rrezikshëm të bandës së Lushnjës të bëhet një biznesmen i suksesshëm në Tiranë. Paloka e quajti perverse përpjekjen e Taulant Ballës për të përmendur fëmijët e tij dhe të të arrestuarit për të justifikuar miqësinë e të dyve.
Paloka la të kuptohet Bego ka fituar tendera dhe licenca në sajë të miqësisë së tij me Taulant Ballën, duke sfiduar në këtë mënyrë prokurorinë dhe policinë.
