Shtyrjen e vendimit për negociatat dhe mungesën e një refuzimi të qartë nga BE për Shqipërinë, Fatmir Xhafaj e sheh si një indulgjencë për skandalin e të vëllait, Agron Xhafajt, aktualisht i dënuar në Itali për trafik droge. Nga foltorja e parlamentit, Xhafaj tha se skena e opozitës për të denigruar figurën e tij duke publikuar audiopërgjimin me babalen dhe vëllanë e tij, ka dështuar.
"E gjithë skena e dështuar që u ngrit për të denigruar ministrin e brendshëm nuk funksionoi. E gjithë historitë e montuara apo tinëzisht të shfrytëzuara nuk ka për qëllim as vërtetësinë dhe aq më pak drejtësinë. Se qëllimi juaj si autor dhe bashkëpunëtor në maskaradat e servirura publikut ishte diku tjetër nuk do aq mend për ta kuptuar. Këtë ua them atyre pak njerëzve që morën mend e tua dhe ju besuan. Është po aq e qartë se sa thatë e bëtë kundër meje kishte qëllim propagandistik tek qytetarët, që ministri i Brendshëm të merrte lincimin publik dhe pak rëndësi ka si do të ishte e vërteta.Ju si dinakë dhe intrigantë u përpoqët të peshkonit mirë në këtë situatë. Jam mëse i vetëdijshëm që reforma e drejtësisë dhe rezultatet e punës time si ministër dhe i policisë së shtetit ka prekur jo pak interesa kriminale, dhe jo vetëm të grupeve kriminale por dhe të disa zyrtarëve e politikanëve të lidhur me fije të shumta interesash financiare dhe kriminale me to, brenda dhe jashtë vendit. Sot këto dy kategori gjenden të bashkuara në këto lum akuzash, duke i shërbyer njëra tjetrës dhe duke vepruar që të më shantazojnë në cilësinë e ministrit të Brendshëm, të shantazhojnë qeverinë dhe vetë institucionet e shtetit.
Ju që besoni se me këtë maskaradë keni gjetur kauzën e radhës gaboheni fort. Dua tju kujtoj një shprehje të njohur : Kush tenton t'i bëjë gropën tjetrit, të presë se shpejt mund të bjerë brenda" u shpreh Xhafaj në parlament.
Ministri i Brendshëm bëri edhe një paralajmërim për kreun e Partisë Demokratike, Lulzim Basha në lidhje me 3.4 milion eurot që u kapën në makinën tip Tojota në portin e Durrësit. Sipas Xhafajt, deklarata e Bashës se informacionin e mori nga shërbimet partnere, ishte një spekullim.
