Një grup gazetarësh investigativë nga Serbia janë duke planifikuar të vijnë në Kosovë. Qëllimi i tyre është hulumtimi i vrasjes së ish-politikanit serb nga Veriu, Oliver Ivanoviq. Sasha Mirkoviq dhe Goran Markoviq janë producentët kryesorë të këtij emisioni.
“Për shkaqe sigurie, nga kolegët gazetarë jemi këshilluar që ne si ekip të vendosemi në Graçanicë ose në Prishtinë. Kjo sepse strukturat kriminale të lidhura me SNS e Vuçiqit paraqesin rrezik për ne”, tha Sasha Mirkoviq.
Sipas Mirkoviqit, ekipi hulumtues do të intervistojë shumë persona dhe personalitete politike në Kosovë, shkruan Indeksonline.
“Do të intervistojmë familjarë, fqinjë, dëshmitarë, policë, prokurorë, politikanë dhe çdo person që mund të jetë me interes”, tha Mirkoviq, duke shtuar se “edhe ekspertë të delikteve të gjakut do t’i intervistojnë”.
Ai ka thënë se është për çudi heshtja dhe mosreagimi i regjimit në Beograd, edhe pse gishti është drejtuar te disa kriminelë lokalë të SNS-së (Lista SRPSKA) në Veri të Mitrovicës.
Përndryshe, mediet e Beogradit e kanë akuzuar Sasha Mirkoviqin që së bashku me CIA-n, nga Shkupi po organizojnë rrëzimin e pushtetit të Aleksandar Vuçiqit.
