Një tjetër anëtar i Gjykatës Kushtetuese do të paraqitet të hënën paradite përpara Komisionit të Pavarur të Kualifikimit për t’iu nënshtruar Vetting-ut. Fatmir Hoxha është Gjyqtari katërt i Kushtetueses që paraqitet përpara Komisionit të Vetting-ut për t’iu nënshtruar testit të pasurisë, integritetit personal dhe profesionalizmit.
Më parë, përpara trupës Gjykuese të Komisionit të Pavarur të Kualifikimit janë paraqitur Fatos Lulo, Altina Xhoxhaj dhe Vitore Tusha. Lulo dhe Xhoxhaj nuk arritën të kalonin testin e Pasurisë, duke u shkarkuar nga detyra. Ndërkohë kolegia e tyre Vitore Tusha kaloi me sukses testin e pasurisë, të figurës dhe të aftësisë profesionale. Ajo është e vetmja gjyqtare që ka kaluar deri tani sitën e Vetting-ut.
Një rrëzim i mundshëm i Fatmir Hoxhës do të thellonte edhe më tej krizën e paprecedentë në të cilën është përfshirë aktualisht Gjykata Kushtetuese, e cila praktikisht numëron vetëm katër anëtarë dhe e ka krejtësisht të pamundur të kryejë funksionin e vet.
Trupi Gjykues i KPP që do të japë vendimin për gjyqtarin e kushtetueses Fatmir Hoxhës përbëhet nga Xhensila Pine, Valbona Sanxhaktari, dhe Alma Faskaj.
