Për të mohuar hamendësimet se ka një marrëveshje në distancë mes Saimir Tahirit dhe Edi Ramës edhe për lënien e mandatit, ka reaguar kreu i grupit parlamentar të PS-së, Taulant Balla.
“Vendim tërësisht personal i Saimir Tahirit që e respektojmë tërësisht dhe dua të ripërsëris atë që kemi thënë këtu e 6 muaj më parë, që kjo është një çështje tërësisht mes Saimir Tahirit dhe drejtësisë.
As e jona, dhe kurrësesi e kësaj opozite gojështhurur që në çdo mundësi që i jepet gjen argumenta për të ndërtuar baltën e radhës ndaj punës së rëndësishme që ka imazhi i Shqipërisë në rrugën drejt hapjes së negociatave", tha Balla.
Dorëzimi i mandatit të deputetit nga Saimir Tahiri në këtë moment, pasi u përpoq ta ruajë dy javë më parë, ka ngritur shumë pikëpyetje. Shpjegimi që i bën opozita është se vendimi u mor pas presionit nga Gjermania, por që gjithsesi është pasojë e një marrëveshjeje me Ramën.
