Një shqiptar me profesion kamarier është kapur me një sasi prej 2.1 kg kokainë në makinën e tij. Lënda narkotike ishte fshehur në një hapësirë të krijuar posaçërisht në bagazhin e makinës.
Karabinierët e Salsomaggiore në Itali e zbuluan atë ndërsa po kërkonin një bandë hajdutësh.
Dhe për ta arrestuar shqiptarin, atyre ju desh të angazhoheshin në një ndjekje të rrezikshme në qendër të Fidenzas.
Në fund të këtij aksioni, në pranga ka përfunduar shqiptari 30 vjeçar, emri i të cilit nuk bëhet i ditur. I riu punonte si kamarier.
Gjatë patrullimeve ditore, policia vuri re një veturë tip "Volkswagen Passat", e cila dyshohej se përdorej për vjedhjeve të banesave aty pranë, ku veçanërisht në shënjestër ishin të moshuarit.
Karabinierët e kanë kapur makinën afër Fisos dhe e kanë ndjekur atë. Drejtuesi, duke parë ndjekjen nga policia, ka ndryshuar papritmas drejtimin e udhëtimit, duke u ndalur më pas në qendër të qytetit të Fidenzas.
Kërkimi i parë i policisë ka zbuluar një dozë kokainë në pantallonat e tij të shkurtra.
Më pas është kontrolluar makina, ku policia ka pikasur "ndryshime" të strukturës së saj. Karabinierët gjetën dy pako të mbështjella me 2 kg e 100 gram kokainë.
30-vjeçari u arrestua duke u dërguar në qelitë e paraburgimit në Parma, ku pritet të vlerësohet vlefshmëria e arrestit.
Droga, duke marrë parasysh cilësinë, prerjen dhe kuotimin e tregut, do të kishte një vlerë të llogaritur prej rreth 200,000 euro./ora news
