Uji ka vërshuar në orët e para të mëngjesit të sotëm nëpër shtëpi në fshatrat Novoselë, Vitore, Mifol, Ferras e Bishan, si pasojë e çarjes së argjinaturave të lumit Vjosë.
Në ndihmë të qytetarëve kanë shkuar Forcat e Armatosura të cilët kanë evakuuar 20 banorë nga banesat e tyre në fshatin Ferras.
Pas një mbledhje të Shtabit të Emergjencës në Novoselë, ku mori pjesë edhe ministri Damian Gjiknuri, u mor vendimi që banorët, shtëpitë e të cilëve janë pranë lumit, të evakuohen për të shmangur ndonjë rrezik të pamenduar.
Pallati i Sportit të Vlorës u pajis me shtretër ku mund të zhvendoseshin njerëzit në nevojë.
