Përplasja mes kryebashkiakes Voltana Ademi dhe kryeministrit Edi Rama pasditen e së mërkurës në ambientet e stadiumit të ri në Shkodër, ka ngjallur reagime të shumta. Krahas gazetarëve të pranishëm në vendngjarje, të cilët i kërkuan shpjegime kreut të qeverisë për gjuhën e përdorur, as ish-prezantuesja e "Pasdite në Top Channel", nuk ka qëndruar gojë lidhur në këtë rast.
“Ti mor surrat kur të përmendësh Shkodrën, dhe kreun e Bashkisë Shkodër, të them të lash gojën mirë përpara, mundësisht me zbardhues rrobash. Shkodrës nuk j’a ul kollaj kryet as ti e as ndonjë tjetër. Ndoshta je mësuar me ushtarët e tu që i komandon dhe kur hanë bukë, por Voltanën nuk e drejton dot si të duash ti. Voltana është aq zonjë, sa e nderon një popull, e na bën krenarë kudo.
I marsh tan të ligat Shkodrës, që s’ka asnjë, veç ndoshta kur shkel këmba jote dhe i del ndonjë virus prej prezencës tane. E shkodra tan jetën ka me mbet Blu, sepse ne jemi popull besnik e jetojmë me ideale nuk shitemi për një thes miell, e as për asgjë tjetër në këtë botë”, shkruan e revoltuar Kozeta Turishta.
Kryeministri Rama dhe kryebashkiakja e Shkodrës debatuan në prezencë të kamerave me tone përçmuese, konkretisht për ndërtimet rreth stadiumit "Loro Boriçi". Rama tha se për këtë qytet nuk do të japë asnjë kokërr leku dhe uroi "Zoti e ndihmoftë Shkodrën".
