Jemi mësuar ta shikojmë si gazetaren seksi të sportit, por këtë herë ka ardhur momenti ta shikojmë ndryshe. Ilda do të vijë për shikuesit si moderatore e show-t më të ri që pritet të nisë së shpejti, “Sfida”, një spektakël që do të dhurojë garë dhe shumë të qeshura. Por për brunen seksi ky nuk është një largim nga sporti, pasi edhe në këtë format ajo është përpjekur të gjejë një garë sportive. Më në fund pranon se gjithçka po ecën perfekt në jetën private, duke na rrëfyer se ndjehet mirë dhe e lumtur. Për Ildën një femër seksi dhe e famshme shkon shumë me një partner miliarder.
Ilda këtë herë tek “Sfida”, si ju erdhi ftesa për këtë format?
Ftesa më erdhi nga producenti i mirënjohur Rezart Aga, të cilin e falënderoj për besimin që pati tek unë. Që në fillim kur ma propozoi më pëlqeu jashtëzakonisht, dhe isha shumë e lumtur që do të isha pjesë e një spektakli me përmasa të tilla.
Si po ndjeheni në një format larg atij sportiv?
Ndihem shumë mirë, sepse në thelb ky lloj formati është një game show, dhe sigurisht që pjesa sportive nuk mungon. Sfida ka sport në brendësi, sepse 2 skuadrat garojnë me njëra-tjetrën për të fituar, të gjithë synojnë çmimin e madh. Dhe çmimi i madh është fantastik! Ekipi fitues do të ndjekë nga afër ndeshjet e Kombëtares gjatë Evropianit Francë 2016.
Do ta keni të vështirë përshtatjen?
Aspak, ndihem shumë komode, sepse dhe mua personalisht më pëlqejnë sfidat.
Si i përzgjidhni personazhet që marrin pjesë në show, çfarë kriteresh duhet të ketë një personazh që të marrë pjesë tek “Sfida”?
Një personazh i cili mund të marrë pjesë në show, mbi të gjitha duhet të jetë i dashur për publikun.
A ka pasur nga ata që e kanë refuzuar duke iu trembur idesë së hedhjes në pishinë?
Jo, nuk ka pasur asnjë të tillë, përveçse disa personazhe kanë qenë në pikëpyetje sepse mosha nuk ja lejonte diçka të tillë, dhe kemi qenë shumë të kujdesshëm në përzgjedhjen e tyre.
E keni menduar largimin nga sporti në mënyrë përfundimtare, për t’ju përkushtuar të tjera programeve?
Jo, sporti është pjesë e jetës sime profesionale. Mund ti përballoj të gjitha sfidat.
Mendoni se do të ishit më e famshme nëse do të ishit angazhuar në një format tjetër, pse jo “Big Brother”?
Nuk jam në kërkim të famës, jam në një moment që dua të bëj gjëra që më japin sadisfaksion.
Ndërkohë shquheni si një ndër femrat më seksi, sa ju ka lodhur ky etiketim?
Të them të vërtetën pak po, por edhe nëse jam, kjo nuk është meritë e imja, është diçka që lind me personin. Të qenurit seksi është diçka e këndshme, përsa kohë një femër nuk është vetëm aq.
Sa kujdeseni për veten?
Kujdesem shumë.
Paragjykohen femrat e bukura?
Gjithmonë.
Sa meshkuj ju afrohen se jeni Ilda Bejleri, gazetarja seksi sportive?
Shumë.
Vijoni të jeni beqare, apo ka ndryshuar diçka në jetën private?
Ndihem mirë. Në të gjitha aspektet.
Një femër seksi a duhet të ketë një të dashur milioner, po të famshëm?
Pse jo?!
/Bluetooth/
