Demokratëve u nevojitet të fitojnë katër mandate nga republikanët për të rimarrë kontrollin e Senatit amerikan në zgjedhjet e ndërmjetme. Edhe pse në zgjedhjet e 3 nëntorit do të vendoset fati i 35 vendeve nga gjithsej 100 në Senat, analistët vlerësojnë se vetëm nëntë shtete konsiderohen si zona të pasigurta elektorale, ku gara mbetet e hapur.
Karolina e Veriut
Demokratët duket se janë në një pozicion të mirë për të fituar vendin e Karolinës së Veriut, ku senatori republikan Tom Tillis po tërhiqet nga politika.
Sondazhet tregojnë se kandidati demokrat, ish-guvernatori Roy Cooper, ruan një epërsi të qëndrueshme ndaj republikanit Michael Whatley, aleat i presidentit amerikan Donald Trump dhe deri vonë kryetar i Komitetit Kombëtar të Partisë Republikane.
Cooper është një figurë e njohur për votuesit e Karolinës së Veriut. Ai ka fituar katër herë zgjedhjet për postin e prokurorit të përgjithshëm të shtetit dhe dy herë ato për guvernator, në vitet 2016 dhe 2020, pavarësisht se në të dyja këto vite Trump mori më shumë vota në nivel shtetëror.
Whatley ka gjithashtu dekada përvojë në politikë, por deri më tani nuk ka kandiduar për ndonjë post të zgjedhur. Lidhjet e tij të ngushta me Trump mund ta dëmtojnë, pasi popullariteti i presidentit amerikan ndodhet në nivelet më të ulëta historike.
Miçigani
Demokratët janë në pozicion mbrojtës në Miçigan, ku shpresojnë të ruajnë vendin e senatorit në largim Gary Peters. Një humbje e mundshme në këtë shtet të pavendosur mund t’i komplikojë përpjekjet e tyre për të marrë kontrollin e Senatit.
Kandidati demokrat Abdul El-Sayed, një politikan me qëndrime progresiste, po përballet me rezerva të konsiderueshme, ndërsa përpiqet të konsolidojë mbështetjen pas fitores së ngushtë ndaj kongresmenes së qendrës, Haley Stevens, në një garë të ashpër brenda partisë.
Kritikat e tij ndaj Izraelit, si dhe lidhjet me krijuesin e përmbajtjeve të majta Hasan Piker, kanë bashkuar krahun e majtë të partisë, por kanë larguar shumë votues me ngjyrë dhe hebrenj në këtë shtet.
Ndërkohë, të dielën e kaluar, Stevens njoftoi se mbështet kandidatin republikan për Senat, Mike Rogers.
Sondazhet tregojnë se El-Sayed dhe Rogers po zhvillojnë një garë shumë të ngushtë. Sipas vlerësimeve, qëndrimet më të majta të kandidatit demokrat mund t’i shtyjnë votuesit e pavarur të preferojnë kundërshtarin e tij republikan.
Teksasi
Ky shtet, tradicionalisht një bastion i republikanëve, është shndërruar këtë vit në një arenë të papritur të përballjes politike.
Sondazhet tregojnë një garë të ngushtë mes demokratit James Talarico, deputet në parlamentin e shtetit dhe ish-student i një seminari fetar, dhe republikanit Ken Paxton, prokuror i përgjithshëm i Teksasit.
Pavarësisht akuzave për tradhti bashkëshortore, të cilat për pak sa nuk e detyruan të largohej nga detyra në vitin 2023, Paxton arriti, me mbështetjen e Trump, të mposhtte senatorin në detyrë John Cornyn, pas një gare të brendshme që shkaktoi përçarje në parti.
Që atëherë, ai ka hasur vështirësi në mbledhjen e fondeve, duke e detyruar partinë e tij të shpenzojë para për të siguruar një mandat që, në kushte normale, do të konsiderohej i sigurt.
Talarico po përpiqet të tërheqë votuesit e pavarur, si dhe republikanët e pakënaqur. Megjithatë, deklaratat e tij të mëparshme lidhur me identitetin gjinor mund të ndikojnë negativisht në fushatën e tij.
Analistët vlerësojnë se gara mbetet plotësisht e hapur.
Alaska
Senatori republikan në largim, Dan Sullivan, përballet me dy probleme: kandidaten demokrate Mary Peltola dhe një kandidat tjetër të pavarur që ka të njëjtin emër me të.
Peltola kishte fituar të vetmin mandat që Alaska ka në Dhomën e Përfaqësuesve. Ndërkohë, kandidat për postin e senatorit është edhe një mësues në pension, Dan J. Sullivan.
Administrata Trump iu drejtua gjykatës për të penguar certifikimin e humbjes së Sullivanit, në rast se votat e hedhura për kandidatin tjetër me të njëjtin emër mund të kishin ndryshuar rezultatin. Megjithatë, të dielën një gjyqtar e rrëzoi këtë kërkesë.
Iowa
Pas një dekade dominimi republikan, gara për Senat këtë vit pritet të jetë e ngushtë. Shteti, një pjesë e madhe e popullsisë së të cilit varet nga bujqësia, po përballet me vështirësi për shkak të tarifave doganore të vendosura nga Trump dhe çmimeve të larta të karburanteve.
Ashley Hinson synon të ruajë mandatin për republikanët, pas tërheqjes së senatores në largim Joni Ernst.
Ajo përballet me Josh Turek, një ish-basketbollist i Lojërave Paralimpike, i cili e vë theksin te bashkëpunimi përtej ndarjeve partiake.
Sondazhet tregojnë se gara do të jetë shumë e ngushtë dhe mund të jetë një nga përballjet më të pavendosura të këtyre zgjedhjeve.
Maine
Demokratët patën vështirësi në korrik për të gjetur një zëvendësues për Graham Platner, një kultivues progresist gocash deti dhe një figurë e re në politikë, i cili u tërhoq pas akuzave për sulm seksual, të cilat ai i mohoi.
Partia u bashkua shpejt rreth Troy Jackson, një ish-punëtor i industrisë së prerjes së drurit dhe deputet në parlamentin e shtetit, i cili ndan të njëjtat qëndrime progresiste me Platner.
58-vjeçari Jackson përballet me senatoren republikane në largim Susan Collins, një politikane e moderuar që shpesh ndjek një linjë të ndryshme nga ajo e partisë së saj.
Collins u zgjodh për herë të parë në vitin 1996 dhe që atëherë është rizgjedhur me lehtësi, ndonëse shteti mbështet vazhdimisht kandidatët demokratë në zgjedhjet presidenciale.
Sondazhet e fundit i japin Jackson një epërsi prej tre deri në katër pikë përqindjeje.
Xhorxhia
Senatori demokrat John Ossoff kërkon të rizgjidhet përballë republikanit Mike Collins, një kongresmen konservator që ka mbështetjen e Trump.
Xhorxhia është shndërruar në një nga shtetet kryesore ku zhvillohen gara të ngushta në zgjedhjet e fundit. Trump fitoi me diferencë të vogël në zgjedhjet presidenciale të vitit 2024, ndërsa 39-vjeçari Ossoff fitoi me diferencë të ngushtë në vitin 2021.
Analistët e konsiderojnë Ossoff një nga kandidatët e mundshëm për nominimin demokrat në zgjedhjet presidenciale të vitit 2028.
Collins ka krijuar një profil të ashpër në rrjetet sociale, gjë që herë pas here i ka kushtuar. Në vitin 2024, ai u kritikua pasi pretendoi se ish-presidenti Joe Biden kishte dhënë urdhër për atentatin ndaj Trump.
Gjatë javëve të fundit, ai është vënë nën vëzhgim për shkak të postimeve raciste të një ish-asistenti të tij, nga të cilat ekipi i fushatës së tij është distancuar.
Shumica e sondazheve tregojnë se Ossoff kryeson ndaj Collins, ndërsa analistët e pavarur vlerësojnë se ai ka epërsi në këtë garë.
Ohio
Ish-senatori demokrat Sherrod Brown shpreson që votuesit të kujtojnë arritjet e tij në fushën ekonomike, ndërsa synon të rikthehet në Senat.
Ai u zgjodh për herë të parë në vitin 2016, por humbi përballë republikanit Bernie Moreno në vitin 2024, kur Trump fitoi në këtë shtet me një diferencë prej 11 pikësh.
Tani Brown po përpiqet të mposhtë senatorin republikan në detyrë Jon Husted, i cili u emërua në vitin 2025 pas dorëheqjes së JD Vance, i cili u largua për të marrë detyrën e zëvendëspresidentit të SHBA-së.
Ohio ka votuar vazhdimisht për republikanët gjatë dekadës së fundit, por sondazhet e fundit tregojnë se Brown kryeson ndaj Husted me tre deri në katër pikë përqindjeje.
Analistët e konsiderojnë këtë garë të hapur dhe të pavendosur.
Fituesi i kësaj përballjeje do të shërbejë për pjesën e mbetur të mandatit të Vance, deri në janar të vitit 2029.
New Hampshire
Kandidati demokrat Chris Pappas përballet me kandidatin republikan John Sununu, i cili ka shërbyer si senator nga viti 2003 deri në vitin 2009.
46-vjeçari Pappas konsiderohet favorit në këtë garë dhe mund të bëhet burri i parë homoseksual i deklaruar hapur që zgjidhet në Senatin amerikan.
