Protestuesit janë zhvendosur dhe po protestojnë para Kryeministrisë. Para zyrës së kryeqeveritarit gjendet tavolina e gurtë që kryeministri Edi Rama ka përdorur ditët e fundit si simbol të ftesës për dialog. Mbi të, disa protestues kanë vendosur një pankartë me mbishkrimin: “Fundi juaj po vjen. Poshtë diktatura! Rroftë Shqipëria!”
Tubimi nisi sërish pranë Ministrisë së Arsimit, në protestën e 19-të kundër qeverisë. Pavarësisht reshjeve të shiut, të rinjtë vijuan qëndrimin në zonë, të pajisur me çadra dhe mushama. Situata u tensionua kur disa protestues të maskuar hodhën gurë dhe molotovë në drejtim të efektivëve. Policia u kundërpërgjigj me gaz lotsjellës dhe ujë me presion, ndërsa një pjesë e turmës nisi të largohej nga zona.
Më pas, protestuesit marshuan drejt bulevardit “Dëshmorët e Kombit”. Gjatë rrugës kaluan edhe pranë selisë së Partisë Socialiste, ku ishin vendosur forca policie, por nuk u regjistruan incidente. Më herët gjatë ditës pati edhe tensione mes disa të rinjve dhe mbështetësve të Partisë Demokratike.
