Edi Rama ka reaguar sërish për pagat e gjyqtarëve. Në një postim në rrjetin social X kryeministri ka shpërndarë një deklaratë të bërë nga gjykatësi Engert Pëllumbi në një intervistë televizive.
“A mund të flasë kështu një gjykatës? Ne kemi qesen tonë të buxhetit. Nuk po marrim nga qeset e të tjerëve. Me pak fjalë, nuk po na lejohet të marrim nga qesja jonë”, citohet të ketë thënë gjykatësi.
Për këtë deklaratë Rama thotë se kjo është e pabesueshme që një gjykatës e shikon kështu buxhetin e shtetit shqiptar dhe pavarësinë e pushtetit gjyqësor.
“E pabesueshme, po e vërtetë që një gjykatës e kupton kështu pavarësinë e pushtetit gjyqësor dhe e shikon kështu buxhetin e shtetit shqiptar”, shkruan Rama në rrjetet sociale.
Kriza e pagave në sistemin e drejtësisë kulmoi pasi Kuvendi nuk miratoi deri më 31 korrik formulën e re të pagave, siç kishte kërkuar Gjykata Kushtetuese.
Pas kalimit të afatit, KLGJ dhe KLP vendosën që nga 1 gushti paga referuese të llogaritej mbi 222 mijë e 425 lekë, plus 14 mijë lekë shtesë për kualifikimin. Ministria e Financave nuk i ekzekutoi listëpagesat me këtë përllogaritje, duke argumentuar se përcaktimi i pagave është kompetencë e Kuvendit.
