Kryeministri Edi Rama do të mbledhë sot deputetët socialistë dhe anëtarët e qeverisë në Pallatin e Brigadave. Takimi nis në orën 10:00, ndërsa pritet të sjellë edhe ndryshime në kabinet. Në qendër të mbledhjes do të jetë koncepti “Prania Besnike”, i prezantuar si modeli i ri i organizimit të socialistëve në terren. Ai synon një prani më të vazhdueshme të deputetëve dhe drejtuesve politikë pranë qytetarëve.
Por vëmendja pritet të jetë edhe te qeveria. Burime bëjnë me dije se Rama mund të njoftojë lëvizje të reja në kabinet. Një skenar i tillë është përdorur edhe më herët. Në janar, disa ndryshime në qeveri u komunikuan pikërisht gjatë një mbledhjeje të përbashkët me deputetët. Takimi vjen një ditë pas mbledhjes së parë të qeverisë për sezonin e ri politik. Gjatë saj u mësua edhe dorëheqja e ministres së Shëndetësisë, Evis Sala, pas afro një viti në detyrë.
