Kryetari i Lidhjes Demokratike të Kosovës, Lumir Abdixhiku ka folur pas takimit që zhvilloi me kryeministrin në detyrë, Albin Kurti.
Ai u shpreh se e ka informuar Kurtin për zhvillimet e fundit në partinë e tij, pasi 6 deputetë të LDK-së nuk i dhanë mbështetje kandidaturës së Bekim Sejdiut për president të vendit.
“Njoftim i rregullt pas zhvillimeve në të dy partitë. Siç e do rendi, kur kemi procese diskutuese duhet të njoftojmë zyrtarisht njëri-tjetrin për zhvillimet partiake. Dhe, këtë e bëra. Atë që ka ndodhur dje, e njoftova dhe ai më njoftoi për zhvillimet në kryesinë e VV-së dhe të Grupit Parlamentar”, - ka thënë Abdixhiku.
Ai nuk ka komentuar shumë vendimin e 6 deputetëve të LDK-së për të mos e mbështetur kandidaturën e Sjediut.
“Tash duhet t’i pyesni ata që kanë vendosur ta dërgojnë Kosovën në një situatë të paqartë”, ka thënë Abdixhiku.
I pyetur se a do të diskutojnë me Aleancën lidhur me gjashtëpikëshin, Abdixhiku tha se përderisa nuk marrin pjesë në zgjidhje të ngërçit politik, vendi shkon në zgjedhje të parakohshme.
“Kjo s’është punë për mua. Jam përpjekur të bëjë një zgjidhje, atëherë bëjnë mirë që të ndihmojnë në zgjidhje. Por deri sa distancohen dhe nuk marrin pjesë në zgjidhje, atëherë vetvetiu shkaktojnë zgjedhje të parakohshme. Kështu nuk është bëhet zgjidhja. Beteja politike për Qeverinë duhet të bëhet për Qeverinë në Kuvendin e Kosovës, çështja e presidentit ta zgjidhim një president, duhet të sillemi normalisht”, tha ai.
Ndërkaq, se a është diskutuar për mundësinë e një dakordimi me Aleancën, Abdixhiku tha se s’ka qenë pjesë e diskutimeve.
“Jo, s’ka qenë pjesë e diskutimeve, por çdo parti është e mirëseardhur. Fatkeqësisht, me atë çfarë po shoh, ne po krijojmë një pamundësi numerike në Kuvendin e Kosovës”, - tha Abdixhiku. /Ekonomia Online
