Komisioni i Prokurimit Publik prej tre muajsh mban të bllokuar një procedurë jetike për institucione strategjike. Që në 23 qershor, Radiotelevizioni Shqiptar i ka dorëzuar dosjen e tenderit për mirëmbajtjen e antenave, pas ankesave të dy operatorëve humbës dhe ende sot nuk ka marrë një përgjigje që do t'i hapte rrugë vijimit normal tëpunës së transmetuesit publik.
Sipas gazetarëve të dosja.al, vetë tenderi, me gjithë përgatitjen e dokumentacionit, zgjati 3 muaj: nga 26 marsi deri në 26 qershor. U shpall procedura, u regjistruan 3 konkurentët, u paraqit dokumentacioni dhe oferta, u shpall fituesi, u administruan ankesat dhe iu përcoll KPP, që ka rolin e gjykatësit, kur prokurimet publike kanë ankesa.
Skandali në këtë rast ka të bëjë me faktin se vetë ligji për KPP, i ka dhënë kohë 20- 30 ditë këtij institucioni për t'u kthyer përgjigje subjekteve. Pra nëse në 26 qershor është çuar procedura, afati maksimal duhet të ishte 26 korriku. Edhe nëse KPP nuk e ka ekspertizën dhe do i duhej ta kërkonte nga një ent i tretë, prapë ligji e detyron që përgjigja të jepet brenda 30 ditësh.
Po KPP as nuk ka shpjeguar arsyet e vonesës dhe as po e merr mundimin për ta parë dosjen, megjithëse në kullat e antenave të Radiotelevizionit Publik, janë vendosur edhe antenat e radiove të policisë, të Shërbimit informativ dhe të Albcontrol.
Nëse gjatë kësaj kohe do të ndodhte një problem, pa patur akoma një fitues për mirëmbajtjen, trafiku ajror do të mbetej pa kontroll dhe fluturimet do të anulloheshin deri kur 5 anëtarët e KPP të zgjoheshin nga gjumi dhe të hapnin dosjen. Pa folur këtu për rëndësinë e sigurisë kombëtare që kanë antenat e SHISH dhe Policisë. E gjitha kjo sepse KPP shkel ligjin dhe askush nuk i kërkon llogari.
Aryset për këtë vonesë të pajustifikueshme, që për më tepër mund të ketë pasoja nga dita në ditë që cënojnë nga interesi i publikut e deri te siguria kombëtare, janë ose papërgjegjshmëria e zyrtarëve të KPP ose interesa të ngushta përfitimi sipas praktikës tashmë të konsoliduar të drejtuesve rilindas. Ismail Shehu, i cili është aktualisht kreu i Komisionit të Prokurimit Publik, u caktua në këtë detyrë me një votim në Kuvend që rrezikoi përçarjen e grupit socialist. Ai thuhet se mbërriti në këtë pozitë të lartë falë mbështetjes së një figure si Belinda Balluku.
