Një 33-vjeçar i shpallur në kërkim ndërkombëtar nga autoritetet italiane është arrestuar në Ndroq, gjatë një operacioni të zhvilluar nga FAST Albania në bashkëpunim me Drejtorinë Vendore të Policisë Tiranë.
Në kuadër të operacionit të koduar “Fast”, specialistët e Sektorit për Kërkimin në Drejtorinë e Forcës së Posaçme Operacionale, në bashkëpunim me shërbimet e DVP Tiranë dhe përmes koordinimit me Interpol Tiranën e homologët italianë, kanë lokalizuar dhe arrestuar provizorisht shtetasin me iniciale D. H., 33 vjeç, banues në Tiranë.
33-vjeçari ishte shpallur në kërkim ndërkombëtar nga Interpol Roma, pasi ndaj tij autoritetet gjyqësore italiane kanë caktuar masën e sigurisë “Arrest në burg”.
Sipas autoriteteve, vendimi është marrë më 31 korrik 2026, ndërsa 33-vjeçari akuzohet për veprat penale “Vrasja”, e mbetur në tentativë, “Plagosja”, “Shkatërrimi i pronës”, “Kundërshtimi i arrestimit” dhe “Kundërshtimi i punonjësit të policisë gjatë ushtrimit të detyrës”.
Pas arrestimit në Ndroq, Interpol Tirana, në bashkëpunim me Interpol Romën, vijon procedurat për ekstradimin e 33-vjeçarit drejt Italisë.
