Derbi i kryeqytetit dhuroi një nga ndeshjet më spektakolare të javëve të para të Abissnet Superiores. Dinamo e drejtuar nga Ilir Daja triumfoi 4-2 ndaj Partizanit në Vorë, në një përballje ku gjashtë gola u shënuan nga gjashtë futbollistë të ndryshëm. Partizani, që e luajti sfidën si skuadër pritëse, nuk arriti të përfitojë nga avantazhi i fushës dhe pësoi një tjetër goditje në një start ku pikët kanë qenë të pakta. Dinamo, në të kundërt, konfirmoi pozicionin e saj në pjesën e sipërme të tabelës, duke e mbyllur javën me 9 pikë.
Pas fitores me Vllazninë, një prapaktheu e fortë për të kuqtë që jo vetëm pësojnë poker, duke e cuar në 8 numrin e golave të lejuar, por tregojnë brishtësi të frikshme në prapavijë. Hekuran Berisha hapi serinë e golave pas një gafe skandaloze të Buxhelajt në minutën e 11’, ndërsa Aliu konfirmohet e vetmja blerje e goditur e Partizanit me golin e shënuar me finesë përballë Teqjas, pas tre minutash.
Skuadra e Ilir Dajës e merr fatin në duart e saj dhe brenda pak minutash shënojnë dy herë, duke shfrytëzuar gabimet në vendosje të të kuqve. Hoxhallari me kokë riktheu avantazhin, ndërsa Silva-Richards bëri tris.
Ajo që bëri Fadairo pastaj ishte nga ato gola që mund të ndryshojnë fatet e lojës, për nga bukuria, vështirësia e ekzekutimit dhe fakti që riktheu në lojë të besuarit e Bratu. Por goli i dytë radhazi me fanellën e kuqe i anësorit nuk shkund sa duhet Partizanin, që pëson të katërtin nga Qardaku.
POKER HISTORIK
Rezultati 4-2 i jep derbit edhe një veçanti statistikore. Një përballje mes Partizanit dhe Dinamos me gjashtë gola të shënuar dhe gjashtë autorë të ndryshëm nuk është një rezultat i zakonshëm në historinë e këtij dueli. Pas vitit 2000, një nga rezultatet më të theksuara mbetet fitorja 5-2 e Partizanit ndaj Dinamos në vitin 2004.
Pas katër javësh kampionat, Dinamo renditet e dyta me 9 pikë, në të njëjtën kuotë me Egnatian. Partizani, ndërkohë, mbetet me vetëm 4 pikë, një diferencë që tregon qartë se dy skuadrat e kryeqytetit po përjetojnë një nisje të ndryshme të sezonit.
Derbi në Vorë nuk solli vetëm tre pikë për Dinamon, por edhe një sinjal të fortë për rivalët: skuadra e Ilir Dajës po qëndron në grupin e ekipeve pretendente, ndërsa Partizani duhet të reagojë shpejt për të mos e thelluar diferencën me kreun. Për Partizanin, situata komplikohet edhe nga mungesat në repartin ofensiv. Xhuliano Skuka dhe Seku Sidibe nuk ishin në dispozicion, ndërsa trajneri Florin Bratu aktualisht nuk i ka pjesë të zgjedhjeve të tij kryesore dy sulmuesit e “demave”.
