Teksa qeveria po përpiqet të shuajë me shpejtësi dhunën dje në Zvërnec, pas pamjeve ku rojet private godasin dhe marrin zvarrë një protestues ndërsa policia rri e bën sehir, në mbrojtje të versionit zyrtar ka dalë edhe ministri i Brendshëm, Besfort Lamallari.
Kur situata është veçanërisht e sikletshme për qeverinë, sepse projekti në Zvërnec lidhet me një investim ku është përfshirë familja Trump, dhe pamjet e dhunës ndaj protestuesve mund ta kthejnë këtë histori nga një skandal lokal në lajm ndërkombëtar, ministri Lamallari ndërton një reagim kundër policisë private dhe policisë Vlorë.
Në reagimin e tij, Lamallari ndalet fillimisht te debati mbi pronësinë e tokës ku parashikohet projekti në Zvërnec. Sipas tij, bëhet fjalë për pronë private dhe qeveria nuk ka falur tokë.
“1. Projekti i Zvërnecit lidhet me një tokë tërësisht private dhe qeveria shqiptare as ka falur tokë, as ka tokë për të falur - jo vetëm sepse ne nuk i kemi falur ndonjëherë tokë askujt, po edhe sepse në këtë rast ajo pronë u është kthyer pronarëve dhe është regjistruar në hipotekë, vite përpara sesa ne të vinim në qeveri.”
Megjithatë, ministri pranon se fakti që prona është private nuk u jep rojeve private të drejtën të përdorin forcë ndaj qytetarëve. Ai kërkon ndjekje penale për personat e përfshirë dhe hetim administrativ për kompaninë e sigurisë.
“2. Po nëse prona është private, rojet private të pronës nuk kanë asnjë të drejtë të përdorin forcë ndaj askujt dhe jo vetëm ata si individë duhet të ndiqen penalisht, siç po ndiqen po edhe për kompaninë e tyre hetimi administrativ për paaftësi totale në ushtrimin e aktivitetit të autorizuar, duhet të mbyllet sa më parë të jetë e mundur.”
Lamallari ka përshëndetur edhe vendimin e Policisë së Shtetit për pezullimin e drejtuesve vendorë dhe nisjen e hetimit për zinxhirin e komandimit. Sipas tij, përveç sjelljes së rojeve private, e papranueshme ishte edhe indiferenca e policisë që ishte e pranishme në vend.
“3. E përshëndes reagimin e shpejtë të drejtorisë së përgjithshme të Policisë së Shtetit për pezullimin e drejtuesve vendorë dhe vënien nën hetim të zinxhirit të komandimit, sepse nuk ishte e papranueshme vetëm sjellja skandaloze e rojeve private, po edhe indiferenca e pajustifikueshme e policisë së pranishme në vend.
Goditja brenda radhëve të Policisë së Shtetit, që nisi në Sarandë dhe ka vazhduar në Vlorë, do të jetë një konstante e punës së strukturave tona në këtë kapitull të ri të drejtimit të tyre. Uniformat blu janë dhe duhet të jenë në çdo rast, garante të rendit ligjor, ku mbrojtja e pronës publike apo private janë një pjesë thelbësore. Por po ashtu ato duhet të garantojnë edhe pacënueshmërinë e besimit të qytetarëve tek uniforma e policisë, prandaj çdo devijim nga këto parime do të goditet përmes bashkëpunimit të ngushtë mes strukturave drejtuese të policisë dhe të Agjencisë së Mbikqyrjes Policore.”
Incidenti në Zvërnec shkaktoi reagime të forta publike, pasi pamjet e shpërndara nga protesta treguan momentin kur rojet private përdorën dhunë ndaj një protestuesi, ndërsa policia e pranishme në zonë nuk ndërhyri për ta ndaluar situatën. ©LAPSI.AL
